Облыс орталығындағы Өнер музейінде суретші Ирина Усовaның «Шығыс Қазақстан табиғаты» атты жеке көрмесі ашылады.
Көрме экспозициясына фотограф Сергей Батуриннің фотосуреттері негізінде салынған 22 кескіндеме туындысы ұсынылған. Фотосуреттер суретшінің шығармашылық ізденісіне негіз болып, туған өлкенің сұлулығы мен өзіндік болмысын кескіндеме өнері арқылы жаңаша танытуға мүмкіндік беріп отыр. Көрмеге қойылған туындыларда Шығыс өңірінің інжу-маржандай тұмса табиғаты бейнеленген. Ертіс пен Үлбі жағалаулы, Қалба жоталары, Бұқтырма су қоймасы. Қарабас тауы, Риддер қаласының маңы, Зайсан қазаншұңқыры және әйгілі Мұзтау келбеті кескіндеме бетінен көрініс тапты.
Суретші табиғаттың сан алуан күйін бейнелеуге ден қояды: көктемнің алғашқы бояулары, жазғы күннің дидары, алтын күз реңі мен қыс мезгілінің мың құбылған бейнесі палитра поэзиясына айналғандай.
Суретші «Бәйшешек», «Тау өзені», «Жазғы күннің батуы», «Аязды таң», «Қос қайың», «Дала кеңістігі» секілді туындыларын жүрек бояуын жұмсап, өз биігінде суреттейді.
Экспозицияда әрбір пейзаждың көңіл күйі мен өзіндік атмосферасын жеткізуге ерекше мән берілген. Түс пен жарықтың үйлесімі, көркем бейнелердің әсері арқылы қоршаған ортаның сан қырлы болмысы, табиғи үйлесімі мен мінсіз сұлулығы ашыла түседі.
«Шығыс Қазақстан табиғаты» көрмесі – күнделікті қарбаластан бір сәтке арылып, көзге таныс табиғат көріністеріне жаңаша көзқараспен үңілуге және адам мен туған жер арасындағы терең байланысты сезінуге мүмкіндік беретін ерекше шығармашылық кеңістік.
