«AMANAT» партиясының «Кедергісіз келешек» жобасы аясында Тарбағатай ауданында ерекше білім беруді қажет ететін балаларға арналған түзету кабинеті ашылды. Бұл орталықтың негізгі мақсаты – ерекше балаларды жеке тұлға ретінде дамыту, оларды әлеуметтік ортаға бейімдеу және қажетті қолдау көрсету.
Жаңа орталық есту, көру, сөйлеу қабілеттерінде, тірек-қимыл жүйесінде, эмоционалды-ерік саласында және зердесінде бұзылыстары бар, психикалық дамуы тежелген балаларға түзету-дамыту көмегін ұсынатын болады. Сонымен қатар, балалардың оңалту және әлеуметтік бейімделу процестерін жетілдіру, кешенді зерттеу жүргізу және жеке дамыту бағдарламаларын әзірлеу басты міндеттердің қатарында.
Мекемеде педагог-психолог, логопед, дефектолог, әлеуметтік педагог, емдік дене шынықтыру және музыкалық ырғақ мамандары жұмыс істейді. Балаларға тегін психологиялық және педагогикалық қолдау көрсетіледі.
Орталықта әлеуметтік-тұрмыстық бағдарлау бөлмесі, Монтессори әдістемелік кабинеті, тұзды бөлме, емдік дене шынықтыру залы, ырғақты музыка, психолог, дефектолог, логопед кабинеттері толық жабдықталып, пайдалануға берілді.
Қазіргі таңда психологиялық-медициналық-педагогикалық кеңес қорытындысы бойынша орталыққа 117 бала жолданған, оның ішінде 61 бала ата-аналарының өтініші негізінде тұрақты түрде қызмет алуда. Сабақтар қазақ тілінде жүргізіліп, жеке және топтық форматта өткізіледі. Оқыту ұзақтығы баланың жас ерекшелігіне қарай 35-45 минут аралығында өтеді.
Жергілікті тұрғындар бұл бастаманың маңыздылығын ерекше атап өтті. Аудан тұрғыны Арайлым Кеңесханова орталықтың ашылуы бала тәрбиесінде айтарлықтай көмек болғанын айтады:
Тарбағатай ауданында ашылған бұл түзету кабинеті ерекше білім беруді қажет ететін балалар үшін маңызды мекеме болмақ. Ол балалардың әлеуметтенуіне, дамуына және сапалы білім алуына ықпал етеді. Бүгінде ерекше балаларға қамқорлық көрсету – ел дамуының басым бағыттарының бірі. Мұндай орталықтардың ашылуы – қоғамның әлеуметтік жауапкершілігінің жоғарылағанының айқын көрінісі.
