Шығыс Қазақстан облысында тұрмыстық қылмыстардың жартысынан көбі алкоголь ішімдік салдарынан болады. Биылғы үш айда өңірде сот шешімімен Әкімшілік құқықбұзушылық туралы кодекстің 54-бабына сәйкес 266 адамға алкогольді ішімдік тұтынуға тыйым салынған. Былтыр мұндай шешім 291 адамға қатысты шығарылған, деп хабарлайды F16.kz.
Департамент бастығының айтуынша, азаматтарды, оның ішінде кәмелетке толмағандарды және әйелдерді қорғауға, сондай-ақ қоғамдық қауіпсіздікке нұқсан келтіретін құқық бұзушылықтардың алдын алуға ерекше көңіл бөлінген. Айталық, жыл басынан бері 1700-ден астам әйел өңірдің дағдарыс орталықтарына психологтан кеңес алуға жіберілген. Одан бөлек 48 әйел мен 17 бала уақытша тұруға арнайы паналау орындарына орналастырылды.
Полиция мен әлеуметтік қызметкерлердің бірлескен жұмысы нәтижесінде әйелдерге қатысты қылмыстар былтырғымен салыстырғанда 7%-ға төмендеді.
Тұрмыста заңға қайшы әрекет жасағаны үшін 1315 адам әкімшілік жауапкершілікке тартылды.
Былтырғы бір жылда есірткі, порнографиялық материалдар, суицидті насихаттау және заңсыз онлайн казино сияқты тыйым салынған ақпаратты таратқан 1 770 сайт бұғатталды. Биыл бұл бағыттағы жұмыстар күшейтіліп, алғашқы үш айдың өзінде осындай 3 000-нан астам сілтеме бұғатталды.
ҚОҒАМДЫҚ ОРЫНДАРДЫ ЛАСТАҒАНДАР ЖАУАПҚА ТАРТЫЛДЫ
Былтыр алкоголь ішімдік ішіп, қоғамдық орындарда мас күйде жүрген 3 047 адам жауапкершілікке тартылса, биыл жыл басынан бері дәл осындай 2 776 жағдай тіркелді.
Былтыр тыйым салынған орындарда темекі шеккен 130 адам әкімшілік жауапкершілікке тартылса, биылғы жыл басынан бері олардың саны 100-ге жетті.
Ұсақ бұзақылық пен қоғамдық орындарды ластау мәселесі де өзекті. Былтыр бұзақылық үшін 335 адам жауапқа тартылса, биыл мұндай 324 жағдай тіркелді.
Біз құқықтық мәдениетті қалыптастыру үшін қоғаммен белсенді өзара әрекет етеміз. Қауіпсіздік пен тәртіп – бұл ортақ жауапкершілік, біздің міндетіміз – құқық бұзушылықтарды анықтау ғана емес, сонымен қатар олардың алдын алу. “Заң және тәртіп” қағидасы әр азаматтың өмірінің негізіне айналуға тиіс, – деді Ерлан Омарбеков.
Шығыс Қазақстан облысының полиция департаменті заңды сақтау және қоғамдық тәртіпке құрметпен қарау – бұл тек міндет емес, сонымен қатар жайлы әрі қауіпсіз өмірдің негізі екенін еске салады. Әрбір адам өзінің азаматтық жауапкершілігін түсініп, қоғамдық нормаларды сақтауға тырысқаны абзал.
Фото: ШҚО ПД баспасөз қызметі
