Шығыс Қазақстан облысында туризм саласындағы сыртқы талдау аяқталды, нәтижесінде бірқатар сыбайлас жемқорлық тәуекелдері анықталды, деп хабарлайды F16.kz.
Бұл туралы Сыбайлас жемқорлыққа қарсы іс-қимыл агенттігі облыстық департаментінің басшысы Денис Шакенов өңірлік коммуникациялар қызметі алаңында өткен брифингте мәлім етті.
Талдау барысында туристік нысандардың құрылысына жұмсалған бюджет қаражатын субсидиялау кезінде негізсіз пайдалану тәуекелдері, туристік операторлық қызметті лицензиялау саласындағы бұзушылықтар, сондай-ақ туристік іс-шараларды ұйымдастыру бойынша мемлекеттік сатып алулармен байланысты тәуекелдер анықталды.
Сонымен қатар, туристік нысандарға қол жеткізуді заңсыз шектеу және демалушылардан заңсыз ақы алу фактілері мәлім болды.
Аймақтағы туристік саланы белсенді қолдау мен дамытуға қарамастан құрылыс шығындарын негізсіз субсидиялау жағдайлары анықталды. Мәселен, бірнеше жыл бұрын пайдалануға берілген туристік нысандар бойынша шығындарды өтеу фактілері кездеседі. Бірақ бұл шаралар тек 2022 жылдың қаңтарынан кейін салынған нысандарға қатысты қолданылуға тиіс. Мұндай нысандар бойынша бюджеттік шығындардың жалпы сомасы 500 миллион теңгеден асады. Бұл фактілер субсидия берудің негізділігіне күмән туғызып, бюджет қаражатын орынсыз жұмсауға алғышарттар жасайды.
Сонымен қатар туристік операторларды лицензиялауда ұсынылған мәліметтердің дұрыстығын тексеруде кемшіліктер анықталды. Кәсіпкерлер тиісті талаптарды айналып өтіп лицензия алған жағдайлар кездесті.
Фото: Өңірлік коммуникациялар қызметі
