Шығыс Қазақстан облысында көктемгі су тасқыны кезеңінде қауіпсіздікті қамтамасыз етіп, гидротехникалық инфрақұрылымның тұрақты жұмыс істеуі басты назарға алынған. Дегенмен өңірдегі бірнеше су қоймасында апатты жағдайлар анықталды, деп хабарлайды F16.kz.
Бұл жөнінде «Қазсушар» РМК Шығыс Қазақстан филиалы директорының орынбасары Дәулет Жанысов өңірлік коммуникациялар қызметі алаңында мәлім етті. Оның айтуынша, аймақта көктемгі тасқынға дайындық аясында су қоймалары мен каналдарға тиісті жұмыстары жүргізіліп, маңызды нысандарды қайта жаңғырту бойынша жоспар әзірленді.
Облыстық филиалдың иелігінде үш су қоймасын, жеті гидроторапты және 43 магистралды канал бар. Қазір жағдай тұрақты. Су қоймалары транзиттік режимде жұмыс істеп тұр, ал су деңгейі тәулік бойы бақылауда.
Бұдан бөлек жалпы ұзындығы 26 шақырым болатын тоғыз магистралды канал механикалық тазартудан өтті, бұл жұмыстар биыл да жалғасады. Былтыр ұзындығы 386,9 шақырым болатын үш гидроторап пен 31 магистралды каналдың жобалық-сметалық құжаттамасын әзірлеуге шарттар жасалды.
![\"\"](\"https://f16.kz/uploads/posts/2025-04/snimok-jekrana-2025-04-09-091605.jpg\")
Материалдық-техникалық базаны жаңартуға ерекше көңіл бөлінген. Былтыр инвестициялық бағдарлама аясында бірнеше техника сатып алынды, тағы 18 техника алу жоспарда бар. Бұл тосыннан келер қауіп-қатер кезінде жедел әрекет етуге және су ресурстарын тиімді басқаруға мүмкіндік береді.
Су шаруашылығы нысандарының үздіксіз жұмысын қамтамасыз ету үшін барлық су қоймаларда тәулік бойы кезекшілік ұйымдастырылған. Олардың жағдайы туралы ақпарат құзырлы органдарға уақтылы жеткізіліп тұрады.
Фото: F16.kz
