Биыл Шығыс өңірінде жалпы құны 102 млрд теңгені құрайтын 9 жоба іске қосылмақ. Бұл туралы ШҚО әкімі облыстық мәслихат сессиясында айтты, деп хабарлайды F16.kz тілшісі.
Айта кетейік, өткен жылы облыстан 49 инвестжоба ұлттық пулға кіріп, 10 жоба сәтті аяқталған.
— Биыл 102 млрд теңгеге 9 жоба іске қосылады. Ең ірілеріне тоқталып өтсек, «Востокмашзаводта» өндіріс жаңғыртылады, Самар ауданында алтын өндіру фабрикасы салынады, Глубокое ауданында майды терең өндеу өндірісінің 2-ші кезеңі жүргізіледі және Өскеменде «MaxiMall» көпфункционалды орталығы ашылады, — дейді Нұрымбет Сақтағанов.
Сонымен қатар аймақ басшысы алдағы жылдары жүзеге асырылатын ірі жобаларды да атап өтті.
— Германиялық Bergbau компаниясы Ұлан ауданында 2029 жылға дейін екі зауыт салуды жоспарлап отыр. Оның бірі литий өндіріп, қайта өңдейтін тау-кен байыту фабрикасы мен литий оксиді концентратын алу үшін пегматит кендерін қайта өңдейтін кәсіпорын болады, — деді ол.
Фото: F16.kz/жасанды интеллект
