Мыңға тарта мемлекеттік қызметші жарыс жолына шықты

Бүгін Өскеменнің Ольга Рыпакова атындағы жеңіл атлетика манежінде мемлекеттік қызметшілердің спартакиадасы басталды. Биылғы дүбірлі жарыс Ұлы жеңістің 80 жылдығына орай ұйымдастырылды, деп хабарлайды F16.kz.

$\"\"$ Бұл бейбітшілік пен болашақ ұрпақ үшін жанын аямаған жауынгерлерге деген құрметтің белгісі.

Спартакиаданың ашылу салтанатында сөйлеген сөзінде өңір басшысы Нұрымбет Сақтағанов облыстық кезеңде үздік шыққандар маусымда өтетін республикалық бәсекеде Шығыс Қазақстан құрамасының атынан өнер көрсететінін атап өтті. Ол да биыл Өскеменде өтеді. Сондықтан жергілікті жанкүйерлерді тартысқа толы бәсекелер күтіп тұр.

Мұндай спорттық іс-шараларға қатысу табандылықты, жеңіске деген жігерді қалыптастырады. Бұл – кәсіби қызметте жоғары нәтижелерге жету үшін мемлекеттік қызметшілерге қажетті қасиеттер. Сонымен қатар спорт ұжымшылдық пен бірлікті нығайтады, – деді облыс әкімі.

Айта кету керек, Шығыс Қазақстанда барлығы 1974 мемлекеттік қызметші жұмыс істесе, соның 950-і спартакиадаға қатысып жатыр. Оның ішінде 175 әйел жарыс жолына шықты. Олар сегіз спорт түрлері: футбол, волейбол, тоғызқұмалақ, арқан тартыс, үстел теннисі, жүзу, шахмат және садақ атудан бақ сынайды.

$\"\"$ Аймақ басшысы барлық сайыскерге сәттілік, командалық рух пен жақсы көңіл-күй тіледі.