Омбы-Майқапшағай республикалық трассасының құрылысы 2025 жылдың соңына дейін толық аяқталады. Бұл туралы көлік министрі Марат Қарабаев Парламент сағатында Сенат депутаты Ольга Булавкинаның сауалына жауап бергенде айтты, деп хабарлайды F16.kz.
ДЕПУТАТТЫҢ СҰРАҒЫ
2021 жылдан бері мен бұл жолдың құрылысы туралы бірнеше рет мәселе көтердім. Сол кезде прокурорлар миллиардтаған ақшаның жымқырылғанын анықтады. Қазір құрылыс жүріп жатыр. Шығыс Қазақстан облысы бойынша жұмыстар аяқталуға жақын, шамамен 80%-ы бітті. Ал Абай облысында 184 шақырымның 10 шақырымы ғана асфальтталған, тағы 26 шақырымына тек бір қабат төселген. Осы жолда халық әлі күнге азап шегіп келеді. Бұл жолды қашан аяқтау жоспарланып отыр? Жұмыстың межелі мерзімде аяқталмауына кім жауап береді? – деп Ольга Булавкина көлік министріне сұрақ қойды.
МИНИСТРДІҢ ЖАУАБЫ
Ведомство басшысы жалпы ұзындығы 415 шақырым болатын трассаның құрылысы осы жылдың соңына дейін толық аяқталатынын, ал Шығыс Қазақстан аумағынан өтетін 198 шақырымдық жолға ең жоғарғы асфальт қабатын жаю жұмысы тиянақталып қалғанын айтты.
Жол құрылысының көп жылға созылып кетуіне шетелдік мердігермен консорциумға кіретін қазақстандық компанияның сенімсіздігі себеп болды. Қазір біз сеніммен айта аламыз, жұмыс 2025 жылдың соңына дейін толық аяқталады. – деді Марат Қарабаев.
Фото: F16.kz/коллаж
