Шығыс Қазақстанда Мемлекет басшысының сайлауалды бағдарламасын орындау мақсатында апатты және тозығы жеткен тұрғын үйлердің иелерін жаңа баспанамен қамту жөніндегі жол картасы бекітілді, деп хабарлайды F16.kz облыстық құрылыс, сәулет және қала құрылысы басқармасына сілтеме жасап.
Белгілі болғандай, барлығы 42 апатты жағдайдағы көпқабатты тұрғын үйді бұзу арқылы 218 пәтер мен үй-жай иелерін жаңа баспанамен қамтамасыз ету көзделіп отыр. Оның 181-і Өскемен қаласында болса, 12-сі Риддерде, 25-і Глубокое ауданының Белоусовка кентінде екен. Осы ретте, бұзылатын көпқабатты үйлердің 37-сі Өскеменде, төртеуі Риддерде және біреуі Белоусовка орналасқанын айту қажет.
Дерек көзіне сенсек, апатты және ескірген үйлер мәселесін шешу мақсатында тұрғын үй-коммуналдық инфрақұрылымды дамытудың 2023-2029 жылдарға арналған тұжырымдамасында тек жергілікті бюджет, жеке инвестициялар мен өзге де көздер есебінен қаржыландыру көзделген. Қазір жаңа үйлер салу үшін жеке инвесторларды тарту мүмкіндігі қарастырылып жатқан көрінеді. Дегенмен, Өскемен қаласындағы апатты үйлердің басым бөлігі санитарлық-қорғау аймағында (Гастелло, Краснознаменная, Стаханов, Промышленная және т. б. көшелер), сондай-ақ инвесторлар үшін тартымсыз аудандарда (Аблакетка, Сол жағалау және Жаңа Гавань) орналасқан.
Ағымдағы жылы Белоусовка кентіндегі апатты жағдайдағы көпқабатты үйдің тұрғындарын көшіру мақсатына жергілікті бюджеттен қомақты қаражат бөлінді. Бұл қаражат қайталама нарықтан 25 пәтер сатып алуға жұмсалады. Ал Өскемен және Риддер қалаларының тұрғындарын қоныстандыру жайы қаржыландыру мәселелерінің шешілуіне қарай қаралатын болмақ.
Фото: pixabay.com
