2028 жылға дейін тау-кен металлургия кешенінің ірі кәсіпорындары энергия тиімділігін арттыру, экологияға кері әсерін азайту және еңбек жағдайларын жақсарту үшін өндірісті жаңғыртуға 1,8 триллион теңге көлемінде инвестиция салады, деп хабарлайды F16.kz.
Еліміздің Өнеркәсіп және құрылыс министрі Ерсайын Нағаспаевтың айтуынша, аталған кәсіпорындардың қызметін тиімді бақылау үшін технологияны қайта жабдықтандыруға бағытталған Бақылау картасы әзірленген.
– Бүгінде кәсіпорындар техникалық жағдайды қолдауға 83 миллиард теңге, жаңғыртуға 202 миллиард теңге, өндірістерді кеңейтуге 148 миллиард теңге көлемінде қаражат бөлді, – дейді министр.
Айта кетейік, еліміздің тау-кен металлургия кешеніне Шығыс Қазақстанда орналасқан «Казцинк» ЖШС, «Өскемен титан-магний комбинаты» АҚ, «ҮМЗ» АҚ сияқты кәсіпорындар да кіреді.
