Көлік терезесінен қолын шығарған жүргізушілер мен жолаушылар енді 10 айлық есептік көрсеткіш мөлшерінде айыппұл арқалайды, деп хабарлайды F16.kz тілшісі.
Елімізде автомобильдің қозғалысы кезінде терезелерден, есіктерден және люктерден дененің кез-келген бөлігін шығаруға тыйым салынады. Бұл талапты елемегендер 10 АЕК, яғни 39 320 теңге мөлшерінде айыппұл арқалайды. Осы ретте, бұл талап жүргізушілерге ғана емес, көлікте отырған жолаушыларға да қатысты екенін айту керек. Яғни, көлік ішіндегі жолаушыларының заңсыз әрекетіне жол берген автокөлік жүргізушілері де жауапқа тартылатын болады.
Ішкі істер министрлігінен нақтылағандай, жаңа талап жүріп келе жатқан көліктерге ғана емес, сонымен бірге кептелісте не бағдаршамның жанында тоқтап тұрған машиналарға қатысты болмақ.
Тіпті, оталып тұрған көліктен де дене мүшелеріңізді сыртқа шығармағаныңыз абзал, – дейді білетіндер.
Әкімшілік құқық бұзушылық туралы кодекстегі жаңа нормаға сәйкес, бұдан былай көліктен қолды, басты және аяқты шығаруға тыйым салынады. Сонымен қатар көліктің люгінен шығып, би билеп, фотоға түсуге де болмайды.
Заңның мақсаты – айыппұл жинау емес, жарақат пен жазатайым оқиғалардың алдын алу, – дейді мамандар.
Ведомстводағылар мұндай шаралар көлік жүргізу мәдениетін арттыруға және халықтың назарын қауіпсіздік мәселелеріне аударуға бағытталғанын алға тартып отыр.
