Самар ауылынан Миролюбовка ауылына дейінгі жол учаскесінде орташа жөндеу жұмыстары басталды, деп хабарлайды F16.kz.
Облыс әкімінің тапсырмасымен екі жыл ішінде 21 шақырым жолға толық жөндеу жүргізіледі.
Биыл жоспар бойынша 6 шақырым жол жаңартылады. Конкурстық рәсімдер жүргізіліп, мердігер жұмысқа кірісіп кетті. Шілденің ортасына дейін аяқтау жоспарда бар. Сондай-ақ жыл көлеміндегі қаражатты есептеп, жететін болса белгіленген 21 шақырымды толық аяқтауды көздеп отырмыз, — дейді аудан әкімі Серік Жеңісов.
Естеріңізге сала кетейік, алты жыл бұрын Васильев өткелі өз жұмысын тоқтатып, аталмыш жол учаскесі қараусыз қалған. Биыл осы жоба аясында «Одесса» паромы қайта іске қосылып, көлік ағыны да көбейе бастады.
Біріншіден, аудан тұрғындарына қолайлы жағдай жасау мақсатында, екіншіден, туризмнің, әлеуметтік-экономикалық дамуына серпін береді, — дейді аудан әкімі.
Сондай-ақ жергілікті билік өкілдері жолдың сапасын да ерекше назарға алатындарын атап өтті.
