Қытай Халық Республикасының Қарамай қаласында Шанхай ынтымақтастық ұйымы (ШЫҰ) елдерінің цифрлық технологиялар саласындағы даму және ынтымақтастық форумы басталды. Форумға Шығыс Қазақстан облысының делегациясы қатысып жатыр, деп хабарлайды F16.kz.
ШЫҰ-на мүше елдердің үздік сарапшылары, мемлекеттік органдардың өкілдері, кәсіпкерлер мен ғалымдар бас қосқан жиында қатысушылар өзара тәжірибе алмасып, цифрлық трансформацияның болашағын талқылайды.
Қазақстандық делегация құрамында білім беру саласының өкілдері, Д.Серікбаев атындағы ШҚТУ қызметкерлері, кәсіпкерлер, IT-компания басшылары, саяси партиялардың және медиа қауымдастықтың өкілдері бар.
Делегация жетекшісі, «Атамекен» ҰКП ШҚОФ жанындағы туризм кеңесінің төрағасы Сымбат Рамазановтың айтуынша, бұл форумға қатысу Шығыс Қазақстанда және тұтастай елде цифрлық бастамаларды одан әрі дамыту үшін үлкен мүмкіндік береді.
Бұл форум барлық қатысушыларға тың серпін беретініне сенімдімін. Өйткені мұнда ШЫҰ елдеріне арналған ақпараттық технологияларды дамыту мәселелері қарастырылады. Форумда ғылыми қызметкерлер, мемлекеттік органдар, министрлер жиналып, жаңа цифрлық шешімдерді іске асыру мен қолдану бойынша пікірталас болады. Біз баяндамашылардың сөзінен өзге елдерде қандай жобалар жүзеге асырылып жатқанын білеміз, — деді Сымбат Рамазанов.
Форум бағдарламасы үш күнге жоспарланған және онда цифрлық дамудың басты бағыттарына арналған тақырыптық сессиялар өтеді. Атап айтқанда, жасанды интеллект, бұлтты есептеулер, есептеу инфрақұрылымын құру, сондай-ақ цифрлық технологияларды экономиканың әртүрлі саласы мен мемлекеттік басқаруға интеграциялау мәселелері қамтылады.
Форумға Өзбекстан, Қырғызстан, Ресей, Беларусь және Тәжікстаннан делегаттар келді.
Қытай-ШЫҰ форумы тәжірибе алмасу, серіктестік байланыстар орнату және цифрлық трансформация саласындағы бірлескен шешімдерді әзірлеу алаңы болады деп отыр мамандар. Нәтижесінде жоғары технологиялар саласындағы ынтымақтастықты нығайтуға бағытталған жаңа бастамалар мен жобалар ұсынылмақ.
Бірлескен ақпараттық платформаларды құру, бірыңғай цифрлық экожүйе қалыптастыру және үлкен деректерді пайдалану арқылы экономиканың барлық бағыттары бойынша ынтымақтастықты кеңейту ең маңызды басымдықтар болады, — деді форумның ашылуында сөз сөйлеген ҚХР өнеркәсіп және ақпараттандыру вице-министрі Сюн Цзицзюнь.
Сондай-ақ форумға Қытайдың түрлі мемлекеттік құрылымдарының жоғары лауазымды өкілдері қатысты.
