Күршім ауданында балық өңдейтін тағы бір өндіріс орны ашылады. Ол Ақсуат ауылында салынбақ, деп хабарлайды F16.kz.
Бүгінде Күршім ауданында балық өңдейтін бір зауыт бар. Ол – «Төре-Тоғам» ЖШС. Қазір аталмыш кәсіпорында өңделетін көксерке балығының сүбе еті Ресей, Қытай, тіпті Литва еліне де экспортталады екен. Алайда, ауданда балықты терең өңдеу жағы әлі де ақсап тұр. Бұл туралы Өңірлік коммуникациялар қызметінде өткен брифинг барысында Күршім ауданының әкімі Мейіржан Әлбеков айтты.
– Аудан аумағында ауланатын балықты терең өңдеу мақсатында Ақсуат ауылында тағы бір цех ашуды жоспарлап отырмыз. Инвестор да бар. Мамыр айының соңында олармен кездесіп, жобаға қатысты мәселелерді пысықтаған болатынбыз. Қазір бұл бағыттағы жұмыстар басталып кетті. Осы ретте ең алдымен «Төре-Тоғам» зауытын модернизациялап, артынша Ақсуаттағы цехты салуға кірісетінімізді айтқым келеді, – деді аудан басшысы.
Мейіржан Әлбековтің айтуынша, жалпы құны 1 миллиард теңге болатын жоба ауданда көксеркеден бөлек, сазан, алабұға, шортан мен табан балығын терең өңдеуге мүмкіндік бермек.
– Терең өңдеу цехы салынғаннан кейін вакуумдық қаптамадағы Күршім балығы Өскемен мен Қазақстанның басқа қалаларына жөнелтілетін болады, – деді ол.
