20–21 қараша күндері Шығыстың бас шаһарында Күршім ауданының өнер керуені келеді, деп хабарлайды F16.kz.
«Туған жер – алтын бесігім» жобасы аясында әр аудан өнерпаздары апта сайын қала жұртшылығына өз өнерін паш етіп, жергілікті өнімдерін жәрмеңкеге қояды. Осы аптада Күршім ауданы өнері мен мәдениетін, ұлттық қолөнерін және ауыл шаруашылығы саласындағы жетістіктерін таныстырмақ.
20 қараша күні сағат 17:00-де облыстық филармония ғимаратының фойесінде Күршім ауданының жергілікті қолөнершілерінің туындылары ұсынылған көрме ұйымдастырылып, ауданның балық өнімдерінен әзірленген фуршет өткізіледі. Күннің мәдени бағдарламасы сағат 18:00-де басталатын концертпен жалғасады.
21 қараша күні сағат 08:00-де Өскемен қаласы, Жібек жолы көшесі, 44 мекенжайында орналасқан «Алтай» көтерме және бөлшек сауда орталығының аумағында Күршім ауданының ауыл шаруашылығы тауар өндірушілерінің жәрмеңкесі өтеді.
Жәрмеңке барысында Күршім ауданының шаруа қожалықтары мен жеке кәсіпкерлері өндіретін сапалы әрі экологиялық таза ауыл шаруашылығы өнімдерін қолжетімді бағамен сатып алуға мүмкіндік бар.
Тұтынушылар назарына ет, балық, сүт және май өнімдері, күнбағыс майы, бал, «Мойнақ» шұжық өнімдері, сондай-ақ «ДЕЕН» ЖШС-нің жылыжайында өсірілген қияр, салат жапырағы, аскөк, жасыл сарымсақ, кинза және басқа да табиғи өнімдер ұсынылады.
Сонымен қатар, жәрмеңке қонақтарына арналған мерекелік концерттік бағдарлама ұйымдастырылады.




