Биыл Күршім ауданындағы үш ауылға интернет тартылады. Бұл туралы Өңірлік коммуникациялар қызметінде өткен брифинг барысында белгілі болды, деп хабарлайды F16.kz.
Күршім ауданының әкімі Мейіржан Әлбековтің қатысуымен өткен баспасөз мәслихатында өңірдің елді мекендерін интернетпен қамту жайы да сөз болды. Аудан басшысы былтыр үш ауылға антенна-мачталық құрылыс орнатылғанын, биыл тағы үш елді мекенде осындай жұмыстар жүргізілетінін хабарлады.
– Ағымдағы жылы ауданымыздағы Жолнұсқау, Амангелді мен Егіндібұлақ ауылдарында аталмыш елді мекендерді интернет желісіне қосуға мүмкіндік беретін антенна-мачталық құрылыстар салынып, пайдалануға берілмек. Негізгі құрылыс-монтаждау жұмыстары аяқталды. Қазір ұялы байланыс операторларымен келіссөздер жүргізілуде. Жалпы, бүгінде аудандағы интернет желісіне қосылған ауылдардың үлесі 78 пайыз шамасында екенін айту керек. Аталған үш ауылға интернет тартылғаннан кейін бұл көрсеткіш 85 пайызға жетуге тиіс, – деді аудан әкімі.
Оның айтуынша, келер жылы Қыстаукүршім, Үшбұлақ, Қойтас ауылдарында да дәл осындай жұмыстар жүргізілетін болады.
