Самар ауылында жылдар бойы шешімін таппай келе жатқан мәселенің бірі – сапалы ауызсу. Бүгінде онда жаңа бастоғанның құрлысы жүріп жатыр. Жергілікті билік өкілері мәселе күзге дейін шешілетінін айтады, деп хабарлайды F16.kz.
2019 жылы басталған бұл жоба түрлі себептермен бірнеше рет кейінге шегерілген. Аяқсыз қалған жобадан халық та үмітін үзе бастаған. Алайда биыл сәуір айында құрылыс қайта жанданды.
Аудан әкімдігі таратқан мәліметке сүйенсек, 1 шілдеден бастап жаңа бастоған сынақ режимінде жұмыс істей бастайды, ал 1 тамыздан бастап толық іске қосылуға тиіс.
Елімізде азаматтардың өмір сүру жағдайларын жақсартуға бағытталған ауқымды инфрақұрылымдық жобалар іске асырылып жатыр. Мемлекет басшысы белгілеген негізгі басымдықтардың бірі халықты сапалы ауызсумен қамтамасыз ету болды. Жаңа нысанның құрлысы менің және жауапты мекемелердің бақылауында. 1 қыркүйекке дейін аудан тұрғындары біртіндеп жаңа жүйеге қосылады. Ал қазір қолданыстағы ескі бастоған да өз жұмысын жалғастыра береді. Ол нысандар 8 жылдан бері үздіксіз жұмыс істеп келеді, алайда соңғы жылдары оның қуаты мен сенімділігі тұрғындардың сұранысын толық қанағаттандыра алмай отыр, — деді Самар ауданының әкімі Серік Жеңісов.
Жаса бастоған іске қосылу арқылы тұрғындар таза және сапалы сумен қамтылып қана қоймай, түнгі уақытта судың жиі өшуі сияқты мәселелер шешімін табады.
Айта кетейік, ауызсу мәселесі Самар ауданына қарасты тағы бірнеше ауылда өзекті. Мәселен, Құлынжон, Аққала және Көкжыра ауылдарындағы жоба әлі де аяқталған жоқ. Аудан тұрғындарымен кездесу барысында облыс әкімі Нұрымбет Сақтағанов барлық жұмыстарды аяқтап, үйлердің орталықтандырылған сумен жабдықтау жүйесіне қосылуын қамтамасыз етуді тапсырды.
