Самар жағалауында жаңа демалыс базасы салынады. Қазіргі уақытта жаңа туристік нысанның жобасы әзірленіп жатыр. Жоба құны — 10 миллиард теңгеден астам, деп хабарлайды F16.kz.
Бұқтырманың Самар ауданы жақтағы жағалауы қазірдің өзінде тек аудан емес, облыс тұрғындарының сүйікті демалыс орнына айналған. Жол түссе Самарға барып демалатын туристермен қатар, қаз қатар тізілген демалыс үйлерінің де саны жыл санап артып келеді.
Аудан әкімдігі алдағы жылдары онда Алакөлдегідей демалыс базасы салуды жоспарлап отыр.
Қазіргі уақытта Бұқтырма су қоймасының жағалауындағы жаңа туристік нысанның жобасы әзірленіп жатыр. Жоба іске асса Алакөлден де асып түседі дегенге үміттенеміз. Онда дәмхана, ресторанмен қатар спорт және жаттығу алаңдары мен демалыс аймақтары да болады, — деді аудан әкімі Серік Жеңісов.
Сондай-ақ Новостройка ауылының маңынан Арбат салу да көзделген.
Аудан әкімінің айтуынша, Самарда шомылу маусымы күзге дейін жалғасатын көрінеді.
Бізде су жылы. Қыркүйекке дейін суға түсуге болады, — деп атап өтті ол.
