Зайсан ауданының сегіз ауылына газ тарту жоспарлануда. Бұл туралы аудан әкімі Аэлита Ахметсәлімқызы мәлім етті, деп хабарлайды F16.kz.
Бүгін Өңірлік коммуникациялар қызметінде өткен брифинг барысында аудан басшысы Зайсандағы елді мекендерді газдандыру мәселесі туралы да айтты.
– Бүгінде газбен Зайсан қаласындағы, сондай-ақ 9 ауылдық елді мекендегі 27,7 мың адам қамтамасыз етілген. Бұл аудан халқының шамамен 78%-ына тең. Енді тағы сегіз ауылға, атап айтсақ, Дайыр, Көкжыра, Қуаныш, Біржан, Сарытерек, Жарсу, Бақасу мен Саржыраға газ құбырын салу жобасы бар. Яғни, бұл жоба жүзеге асқан соң, қосымша 5,4 мың адам газдың игілігін көреді деген сөз, – деді аудан әкімі.
Оның сөзіне сенсек, жобалық-сметалық құжаттамаға түзетулер енгізіліп, сараптаманың оң қорытындысы алынғаннан кейін Энергетика министрлігіне қаржыландыру үшін өтінім жіберіледі.
Белгілі болғандай, магистральдық газ құбырлары жоқ 15 ауылдағы халықтың қалған 7%-ын газбен қамту мәселесі көгілдір отынның баламалы көзі анықталғаннан кейін қаралатын болады.
«Тарбағатай Мұнай» ЖШС мәліметі бойынша, кен орнының барланған бөліктеріндегі газдың қалдық қоры 216 миллион м³ шамасында екен. Бұл шамамен 6,8 жылға жететін отын мөлшері. Ал барланбаған кен орындарында – 125 миллион м³, яғни 10,6 жылға жететін газ қоры бар екен.
