Маусымның 20-сы күні Шығыс Қазақстан облысы Ұлан ауданының Алғабас ауылы маңындағы Синегорье орман шаруашылығы аумағында шыққан орман өрті жедел түрде сөндірілді, деп хабарлайды F16.kz.
Өрттің тұтануы күндізгі сағат 14.26 шамасында байқалды. Ол жерге дереу орман күзеті мен төтенше жағдайлар қызметінің күштері жіберілді. Өртті сөндіруге 20 орман күзетшісі мен бес техника, сондай-ақ аудандық ТЖ бөлімінен жеті қызметкер, өрт сөндіру техникасы, дрон және спутниктік байланыс құралдары жұмылдырылды.
Өскемен қаласынан қосымша 12 адамнан тұратын топ келіп көмектесті. Тілсіз жаудың ошағына жету қиын болғандықтан өрт сөндіруге МИ-8 тікұшағы жұмылдырылды. Әуе көлігімен сегіз рет су төгіліп, өрттің негізгі ошағын сөндіруге мүмкіндік туды.
Өрт сағат 6.45 шамасында, сағат 7.00-де толық сөндірілді. Алдын ала мәлімет бойынша, өрттің шығуына найзағай себеп болған.
