Оқыс оқиға 21 маусым күні Марқакөл ауданына қарасты Боран ауылынан шамамен 5 шақырым жердегі Қара Ертіс өзенінде болған, деп хабарлайды F16.kz.
Алдын ала мәліметтерге сәйкес, жасөспірім суға түсуге тыйым салынған жерге шомылып, ағысқа қарсы төтеп бере алмай қалған. Оны құтқармақ болған екі ересек азамат та суға кетті.
Барлығы Зайсан ауданының тұрғындары екені анықталды.
Зайсан ауданы әкімінің тапсырмасымен жедел жұмыс тобы құрылып, аудандық төтенше жағдайлар бөлімі, полиция, жергілікті атқарушы органдар мен еріктілер жұмылдырылған.
Зайсан ауданы әкімдігінің ұйымдастыруымен қосымша күш ретінде Тұғыл ауылынан 7, Зайсан ауданынан 3 қайық, 1 дрон және 7 автокөлік пен еріктілер тартылды.
Сонымен қатар, Өскемен қаласы, Зайсан, Марқакөл, Күршім аудандарының құтқару қызметтері, полиция, жергілікті атқарушы органдар, волонтерлер мен Боран ауылындағы гидробекет қызметкерлері жүзу және іздеу құралдарымен бірге іздестіру жұмыстарына тартылды.
