Қазақстанда Денсаулық сақтау министрлігінің мұрындық болуымен жазғы кезеңде балалардың денсаулығын сақтауға бағытталған «Салауатты жаз-2025» профилактикалық науқаны басталды, деп хабарлайды F16.kz.
Денсаулық сақтау министрлігінің ақпараты бойынша, бағдарлама жаз бойы жалғасып, медициналық тексерулерді, білім беру акцияларын, мектептің медицина қызметкерлерін оқытуды және басқа да іс-шараларды қамтымақ.
Науқан шеңберінде өңірлерге және ауылдық елді мекендерге жылжымалы медициналық кешендер шығады. Олардың құрамында педиатрлар, офтальмологтар, стоматологтар, хирургтар мен басқа да мамандар болады. Сондай-ақ, негізгі кезеңде қаралмаған балалар үшін қосымша тексерулер жоспарланған, ал медициналық ұйымдарда «Ашық есік күндері» және «Өз денсаулығыңды тексер» акциялары өткізіледі.
– Созылмалы аурулары бар балаларға ерекше назар аударылады. «Салауатты жаз» шеңберінде олар қажетті сауықтыру мен бақылауға ие болады, – деп жазады министрліктің баспасөз қызметі.
Сонымен қатар, бағдарлама БАҚ-та, әлеуметтік желілерде, мектеп жанындағы және жазғы лагерлерде кең ақпараттық-түсіндіру жұмыстарын қамтиды. Ата-аналар мен балаларға инфекциялық аурулардың профилактикасы, қауіпсіздік және психоэмоционалды денсаулық мәселелері бойынша жадынамалар, бейнероликтер мен инфографика қолжетімді болады.
Тамыз айында, оқу жылы қарсаңында мектептің медицина қызметкерлерін алғашқы көмек көрсету, тамақтануды ұйымдастыру және балаларды психологиялық қолдау бойынша оқыту басталады.
