Биыл Үлкен Нарын ауданына қарасты Көктерек және Кіші Нарын ауылдары орталықтандырылған су жүйесіне қосылды, деп хабарлайды F16.kz.
Президент жарлығымен аудан қайта құрылғанда тұрғындардың қуанышында шек болмаған. Себебі халық жаңа ауданға жаңаша көңіл бөлініп, қордаланған мәселелер шешімін табады деп сенді.
Аудан әкімінің айтуынша, мұнда ауыл халқының жағдайын жақсарту үшін инфрақұрылым тарту, демалыс орындарын салу сияқты жұмыстар жалғасып жатыр.
Тұрғындар ауыз су тартылғанын жылдар бойы күтті. Биыл екі ауылда бұл мәселе оңынан шешілді. Қазір Үлкен Нарын ауылында су құбырлары желілерін және құрылыстарын қайта жаңғырту жұмыстары жалғасуда, — деді аудан әкімі Елдос Байрахметов.
Естеріңізге сала кетейік, ел Президенті 2025 жылы Қазақстан халқын 100 пайыз таза ауыз сумен қамтуға тапсырма берген.
Үлкен Нарын ауданының әкімдігі бүгінде бұл тапсырма аясында жұмыс жүріп жатқанын атап өтті.
2025-2026 жылдары Алтынбел, Үштөбе, Солдатово және Көкбастау ауылдарын сумен қамтамасыз ету жоспарланып отыр. Бұл жобаларды іске асыру арқылы көрсетілген мерзім соңына дейін елді мекендерді орталықтандырылған сумен қамту деңгейі 100%-ға жетеді, — деді Елдос Байрахметов.
