Алдағы екі жылда Тарбағатай ауданында жарық тартылмаған ауыл көшесі қалмайды. Бұл жөнінде Өңірлік коммуникациялар қызметінде өткен брифинг барысында белгілі болды.
Баспасөз мәслихатына қатысқан Тарбағатай ауданы әкімінің орынбасары Марат Қызов өңірде ауыл көшелерін жарықтандыру қарқынды жүріп жатқанын айтты.
Белгілі болғандай, 2023 жылы аудан бойынша 22,5 шақырым көшеге 680 жарық бағаны орнатылып, 444 ескі шам жаңаланыпты. Бұл жұмыстарға 78 миллион теңге қаражат жұмсалған.
Ал 2024 жылы ауыл көшелерін жарықтандыруға қатысты 14 жоба әзірленіп, 86,3 миллион теңге қаражат игерілген. Оның ішінде 5 ауылға (Тұғыл, Қабанбай, Маңырақ, Құйған, Шорға) «Ауыл – ел бесігі» бағдарламасы арқылы, 9 ауылға (Сарыөлең, Жаңаауыл, Шеңгелді, Жалаңаш, Қарой, Жолқұрылыс, Ақжар, Қарасу, Жетіарал) жергілікті бюджеттен көше шамдары орнатылды.
– Биыл Ақжар, Жаңалық, Жаңатілеу, Тұғыл, Жаңаталап және Ахметбұлақ ауылдарына «Ауыл – ел бесігі» бағдарламасы бойынша жергілікті бюджеттен жалпы құны 20,2 миллион теңгеге көше шамдары орнатылады. Жалпы алғанда, 2026-2027 жылдары аудандағы барлық ауылдық елді мекеннің көшелерін 100% көше шамдарымен қамтамасыз етуді жоспарлап отырмыз, – дейді аудан әкімінің орынбасары.
