Мемлекет басшысының бастамасымен қоғамда заң мен тәртіп идеологиясын ілгерілету жөніндегі тұжырымдама аясында республикалық «Заң және тәртіп апталығы» акциясы басталды, деп хабарлайды F16.kz.
Іс-шараның мақсаты – қоғамда құқықтық тәртіп идеяларын, заңға құрметпен қарауды қалыптастыру, тұрақты құқықтық сананы және жоғары құқықтық мәдениетті нығайту.
Шығыс Қазақстан облысы аумағында акцияны бастап, оны салтанатты түрде ашқан облыс прокурорының орынбасары Ерлан Бұланбаев бұл бастаманың маңызына тоқталды.
Акцияның алғашқы күнінде прокуратура, полиция, сыбайлас жемқорлыққа қарсы қызмет және экономикалық тергеп-тексеру қызметінің қызметкерлерінен құралған қоғамдық қабылдаулар өтті. Олар халық көп шоғырланатын орындарда ұйымдастырылып, тұрғындарды барынша көбірек қамтуды көздеді.
Қоғамдық қабылдаулар аясында азаматтарға құқықтық мәселелер бойынша түсіндіру жұмыстары жүргізіліп, кеңес беру қызметтері көрсетіле бастады.
Акцияның алғашқы күні мобильді топтар 200-ден астам адамды қабылдады. Оларға құқықтық мәселелер бойынша кеңес беріліп, түсіндіру жұмыстары жүргізілді.
Сонымен қатар азаматтарға алаяқтықтың кең таралған тәсілдері, есірткі саудасына қалай тартылып кетпеу және құрбан болмау, балалар құқығының бұзылу фактілері бойынша қайда және қалай жүгінуге болатыны туралы ақпарат берілген жадынамалар таратылды. Жадынамаларда QR-кодтар бейнеленген.
Қоғамдық қабылдаулар алдағы апта бойы өз жұмысын жалғастырады және Өскемен қаласы ғана емес, облыстың шалғай ауылдары да түгел қамтылады.
