Қазақстанда заманауи бейнемониторинг жүйесінің көмегімен 585 қылмыстық құқық бұзушы ұсталды. Олардың 285-і – іздеуде жүрген тұлғалар, деп хабарлайды F16.kz порталы qazaqstan.tv—ға сілтеме жасап.
Ішкі істер министрлігінің мәліметінше, қоғамдық қауіпсіздікті қамтамасыз ету мақсатында ел аумағында жасанды интеллектке негізделген бейнебақылау жүйелері белсенді қолданысқа енгізіп жатыр. Қазір 19 мыңнан аса бейнекамера смарт технологиялармен жабдықталып, нақты уақыт режимінде жұмыс істейді.
Жүйеге 75 мыңнан астам азаматтың фотосуреті жүктелген. Жасанды интеллект арқылы жабдықталған камералар адамның бет-бейнесін сәйкестендіру, топ болып жиналған адамдарды анықтау, сондай-ақ қару немесе күдік тудыратын заттарды тіркеу секілді кешенді міндеттерді орындайды.
Ішкі істер министрінің орынбасары Сәкен Сәрсеновтің айтуынша, бұл – қылмыстың алдын алуда және жедел ашуда маңызды құрал.
Қазір 19 мың интеллектуалды камера іске қосылған. Алдағы бір-екі жылда олардың санын 80 мыңға дейін арттыру көзделіп отыр. Бұл – тек тіркеу емес, алдын алу, болдырмау және дереу әрекет ету мақсатындағы жүйе, – деді ол.
