Бұқаралық ақпарат құралдары қызметкерлерінің кәсіби мерекесіне орай Өскеменде Quiz өтті. Зияткерлік ойынға журналистер мен баспасөз хатшылары қатысты, деп хабарлайды F16.kz.
Қазақстан Журналистер одағының облыстық филиалы ұйымдастырған ойынға KAZ Minerals компаниясы демеушілік көрсетті.
Мерекелік жиында өңірдегі БАҚ өкілдерінің еңбегі еленіп, марапаттар табысталды. Биыл 75 жасқа толып отырған арагер журналист Айтмұхамбет Қасымов құттықтау сөз сөйлеп, Журналистер одағының жаңа мүшелеріне куәліктер мен төсбелгілер табысталды. Олардың қатарында Ирина Плотникова, Елена Мацковская, Алтынсары Құдайбергенқызы, Александр Каримов, Қарлығаш Қанатқызы және Дәурен Жаңбырбай бар.
Облыстық «Дидар» газетінде ұзақ жыл еңбек еткен Бекәділ Сәдібековке «Қазақстанның құрметті журналисі» медалі тапсырылды. Ал Нұржан Кенжеұлы, Ростислав Захаров, Айнагүл Бәкімбаева мен Дарын Нұрсапарға Қазақстан Журналистер одағы төрағасы Сейтқазы Матаевтың Құрмет грамоталары берілді.
Филиал төрағасы Мерей Қайнарұлы әріптестеріне алғыс хаттар табыстады. Марапатталғандар қатарында Ержан Әбіш, Қуаныш Рахметолла, Айгүл Базарова, Арай Ақылжанқызы, Әсел Әміренова, Гүлнұр Түсіпова, Мадина Кәрібаева, Ғафура Сәрсенбайқызы, Ермек Дюзкенов, Айым Касембаева және бірқатар аудандық басылым ұжымдары бар.
Бұл шараның басты мақсаты – өңірдегі журналистердің өзара кәсіби байланысын нығайту және ынтымақтастықты арттыру. Quiz ойынына 10-нан астам команда қатысты, – деді Мерей Қайнарұлы.
Зияткерлік сайыс нәтижесінде бірінші орынды Ustinka.kz сайтының командасы жеңіп алды. Екінші орынды «Алтай» телеарнасы иеленсе, үшінші орын өңірлік баспасөз қызметі өкілдеріне бұйырды.
Дана Әбдікәрім
