Шығыс Қазақстан облысының әкімі Нұрымбет Сақтағанов Тарбағатай ауданына жұмыс сапары аясында тұрғындармен кездесіп, ашық сұхбат құрды, деп хабарлайды F16.kz.
Бүгінгі кездесуде біз экономиканы көтеру және әртараптандыру, инфрақұрылымды дамыту, өзекті әлеуметтік мәселелерді шешу мәселелеріне тоқталамыз. Президент 2029 жылға дейін экономикалық өсімді екі есе арттыруды тапсырды. Жалпыөңірлік өнімнің 40%-ы өнеркәсіп үлесінде екенін және сыртқы факторлардың ықпалын ескере отырып, біз экономиканы әртараптандыру жұмысын жалғастырып келеміз. Экономиканың жыл сайынғы өсімін қамтамасыз ету үшін өңірлік жобалық кеңсе құрылды. Барлық қала-аудандарда экономикалық өсім нүктелерінің бес жылдық жоспары және ауылдық округтердің Жол карталары бекітілді. Әрбір аудан әкімімен 2025 жылға арналған нысаналы индикаторларға қол жеткізу бойынша меморандумдарға қол қойылды, онда нақты жобалар мен іс-шаралар қамтылған, – деді Нұрымбет Сақтағанов.
ҚОМАҚТЫ ИНВЕСТИЦИЯ ТАРТЫЛАДЫ
Облыс әкімінің айтуынша, Тарбағатай ауданының агроөнеркәсіптік кешен мен өнеркәсіп салаларын дамыту әлеуеті жоғары. Сонымен қатар экономикалық және адами капиталы жеткілікті. Ауданның 2029 жылға дейінгі даму жоспарына сәйкес бюджеттен 20,3 млрд теңге бөлу және 231,2 млрд теңге жеке инвестиция тарту көзделіп отыр.
СУ АРНАЛАРЫ ЖАҢҒЫРТЫЛАДЫ
Өңір басшысы ауданның даму жоспарына енгізілген іс-шаралардың сапалы әрі уақтылы орындалуын, табысты арттыру көздерін іздестіру және салық базасын кеңейту жұмыстарын жандандыруды тапсырды.
Облыстық ауыл шаруашылығы басқармасы мен Тарбағатай ауданының әкімдігіне Қандысу су қоймасына қарасты 20 ішкі шаруашылық арналарға қайта жаңғырту жұмыстарын жүргізу үшін жобалық-сметалық құжаттаманы әзірлеуді тапсырды. Бұл шаралар жер мен су ресурстарын тиімді пайдалануға және өсімдік шаруашылығы өнімдерінің көлемін арттыруға бағытталған.
МЕДИЦИНА МЕКЕМЕЛЕРІНЕ ЖӨНДЕЛЕДІ
Аймақ басшысы ауданға қажетті медициналық кадрларды тарту жұмыстарын күшейтуді, жыл соңына дейін аудандық аурухананың жұқпалы аурулар бөлімшесінің және Тұғыл ауылындағы дәрігерлік амбулаторияның күрделі жөндеуін аяқтауды, сондай-ақ экономика және бюджеттік жоспарлау басқармасымен бірлесе отырып Ақжар ауылындағы емхананы күрделі жөндеуге арналған шығындарды 2026–2028 жылдарға арналған бюджет жобасына енгізуді тапсырды.
Биыл Ақжарда денешынықтыру-сауықтыру кешенінің құрылысы мен стадионды қайта жаңғырту, сондай-ақ Жанатілеу ауылдық клубын күрделі жөндеу жұмыстары аяқталады.
