Өскемен – Семей бағытындағы тасжолдың тағы бір бөлігі жөнделетін болады. Бұл туралы Өскемен қаласының әкімі Алмат Ақышов мәлім етті, деп хабарлайды F16.kz.
Белгілі болғандай, бұл жолы облыс орталығының кіреберісінде орналасқан Прудхоз ауылының тұсындағы жол учаскесі қалпына келтірілмек.
– Өскемен – Семей тас жолының Прудхоз ауылы маңындағы телімінің жағдайын тексердім. Бұл жол бөлігінің сапасына қатысты көлік жүргізушілері мен жолаушылар тарапынан шағымдар келіп түскен болатын, – деді Алмат Ақышов.
Оның айтуынша, алдағы уақытта аталған учаскеде жол жабынын орташа жөндеу жұмыстары басталуға тиіс. Жұмыстар жол қозғалысына қатысушылар үшін жайлылық пен қауіпсіздікті қамтамасыз ету мақсатында белгіленген стандарттарға сәйкес жүргізілетін болады.
