Өскеменде төленбеген 32 айыппұлы бар көлік жүргізушісі ұсталды. Айыппұлдардың жалпы сомасы 825 мың теңгеден асқан, деп хабарлайды F16.kz.
«Мерген» аппараттық-бағдарламалық кешенінің 32 төленбеген нұсқамасы анықталған қала тұрғынының басқаруындағы «Лада» маркалы автокөлігін жергілікті тәртіп сақшылары тоқтатқан.
Белгілі болғандай, бұзушылықтардың дені ҚР Әкімшілік құқық бұзушылық туралы кодексінің 592-бабы (белгіленген қозғалыс жылдамдығынан асыру) бойынша жасалған. Осыған байланысты борышкердің көлігі айыппұлдар толық өтелгенге дейін мамандандырылған тұраққа қойылды.
Өскемен қаласының полиция басқармасы айыппұлдар уақтылы төленбеген жағдайда айыппұл салу туралы қаулы мәжбүрлеп орындауға жіберілетінін ескертеді.
