2024 жылы үлкен экранға шыққан «Қажымұқан» фильмі Италияда өткен XXIX Халықаралық IPAAF – Apoxiomeno кинофестивалінде биіктен көрінді, деп хабарлайды F16.kz тілшісі Мәдениет және ақпарат министрлігіне сілтеме жасап.
Аталмыш министрліктің, сондай-ақ Ұлттық киноны қолдау мемлекеттік орталығының қолдауымен түсірілген картина фестивальдің басты марапаттарын жеңіп алды. Атап айтсақ, «Үздік фильм», «Үздік ер адам рөлі» (Ербол Төлепберген), «Үздік режиссура» (Қанағат Мұстафин) және «Үздік сценарий» (Қанағат Мұстафин, Жанат Қасабеков) номинациясын иеленді.
Фильм режиссері Қанағат Мұстафин тарихи фильм сценарийіне 2012 жылы кіріскен. Он жылдан астам уақыт зерттеу жүргізіп, нәтижесінде өткен жылы өз туындысын көрермен қауым назарына ұсынған.
Қажымұқан Мұңайтпасов – француз күресінен Әлем чемпионы атанған тұңғыш қазақ. Ол – әлемдік, аймақтық, ресейлік, кейін Бүкілодақтық супер ауыр салмақтағы классикалық күрес чемпионаттарының бірнеше дүркін жеңімпазы. Балуан өзінің спорттық мансабында елуге жуық медаль мен марапатқа ие болып, ұлт мақтанышына айналған.
Айта кетейік, 30 жылдық тарихы бар IPAAF-Apoxiomeno фестивалі – Италияда өтетін беделді халықаралық мәдени іс-шаралардың бірі. Фестиваль, әсіресе әлеуметтік маңызы бар тақырыптарды қозғайтын, көркемдік деңгейі жоғары және мәдени дамуға ықпал ететін шығармаларға баса назар аударады.
