Бүгіннен бастап елімізде кәсіби қабылдаушы отбасы институты іске қосылады. Бұл ата-анасының қамқорлығынсыз қалған балаларға қолдау көрсетудің тиімді тетігі ретінде қарастырылып отыр, деп хабарлайды F16.kz.
Кәсіби қабылдаушы отбасы – бұл арнайы дайындықтан өткен, мемлекетпен келісімшартқа отырған және бірнеше баланы уақытша тәрбиелеуге қабылдай алатын отбасы. Жаңа жүйе бойынша бір отбасы төрт балаға дейін қамқорлық жасай алады.
Балаларды орналастырудан бұрын үміткерлер міндетті оқытудан өтіп, тиісті құжаттар пакетін ұсынуға тиіс. Олардың талапқа сай келуі мен бекітілуі қамқоршылық және қорғаншылық органдарының шешімімен жүзеге асырылады. Оқыту курстары жетім балаларға арналған мемлекеттік мекемелерде немесе осы салада жұмыс істеуге аккредиттелген ұйымдарда ұйымдастырылады.
Оқу-ағарту министрлігінің Балалардың құқықтарын қорғау комитетінің төрайымы Насымжан Оспанованың айтуынша, кәсіби қабылдаушы отбасы моделі интернаттық мекемелерге баланы орналастыруды айналып өтіп, оны бірден отбасылық ортаға бейімдеуге мүмкіндік береді. Бұл ең алдымен баланың психологиялық жағдайына оң әсерін тигізеді.
Жаңа форматтың басты артықшылығы – балалар интернатқа емес, бірден отбасына беріледі. Бұл балаға мейірім мен жылулыққа толы тұрақты ортаға бейімделуге көмектеседі, – деді Насымжан Оспанова.
Мемлекет кәсіби қабылдаушы отбасыларына жан-жақты қолдау көрсетуді көздейді. Әрбір бала үшін ай сайынғы жәрдемақы қарастырылған. Сонымен қатар, тәрбиелеу қызметі үшін ата-анаға еңбекақы төленеді.
Бүгінгі таңда Қазақстанда балаларды отбасына орналастырудың төрт түрі бар. Олар: асырап алу, қамқоршылық, патронат, қабылдаушы отбасы.
Кәсіби қабылдаушы отбасы — осы жүйеге қосылатын жаңа, әлеуметтік жауапты әрі сапалы үлгі болмақ. Бұл модель ата-анасыз қалған балалардың қоғамға бейімделуіне және тұлғалық дамуына оң серпін береді деп болжанып отыр.
