Qnet қаржы пирамидасын ұйымдастырушылардың мүлкі тәркіленіп, мемлекет меншігіне қайтарылды, деп хабарлайды F16.kz.
Өскемен қалалық прокуратурасының мәліметіне сүйенсек, 2021 жылғы Mercedes-Benz G63 AMG маркалы автокөлігі 2023 жылы 27 қазан күні Ақтөбе қаласының №2 сотының үкімімен қаржы пирамидасы ұйымдастырушыларының бірінен тәркіленген.
Алайда үкімнің орындалуынан жалтару мақсатында көлік басқа тұлғаның атына қайта рәсімделіп, оның сәйкестендіру нөмірлері өзгертілген. Бұл ретте сот орындаушылары көліктің тұрған жерін анықтау үшін тиісті шаралар қабылдамаған. Қоғамдық мүдделерді қорғау бөлімінің қызметкерлері ресми дилермен бірлесіп, биллингтік деректерді пайдалана отырып, көлікті Алматы қаласынан тапты. Сонымен қатар шетел аумағында дәл сол VIN-коды бар көлік бар екені анықталды, — дейді прокуратура өкілдері.
Прокуратураның тапсырмасы бойынша атқарушылық іс жүргізуге қатысушыларға қарсы тексерулер мен жауап алулардың нәтижесінде 2025 жылғы 6 маусымда Қазақстан Республикасы Қылмыстық кодексінің 425-бабының 5-бөлігі бойынша қылмыстық іс қозғалды.
Ал 24 маусымда көлік Алматыдан Өскемен қаласына жеткізілді. Бүгінде оны Шығыс Қазақстан облысының мемлекеттік мүлік және жекешелендіру департаментіне тапсыру мәселесі қаралып жатыр.
