Шығыс Қазақстан облысының әкімі Нұрымбет Сақтағанов Қазақстан Республикасы Парламенті Сенатының депутаттары Ольга Булавкина және Шәкәрім Бұқтұғұтовпен кездесті, деп хабарлайды F16.kz тілшісі облыс әкімінің баспасөз қызметіне сілтеме жасап.
Кездесу барысында Аграрлық мәселелер, табиғатты пайдалану және ауылдық аумақтарды дамыту комитетінің мүшесі Ольга Булавкина мен Экономикалық саясат, инновациялық даму және кәсіпкерлік комитетінің мүшесі Шәкәрім Бұқтұғұтов облыс әкімімен бірге өңірдің дамуына қатысты негізгі мәселелерді талқылады.
– Шығыс Қазақстан – еліміздегі бірегей өңірлердің бірі. Сондықтан туризм кластерін дамытуға айрықша мән беріліп отыр. Облыс табиғи және мәдени мұраға бай, ал біздің міндетіміз – осы әлеуетті толық ашуға мүмкіндік беретін инфрақұрылым қалыптастыру және оның тұрғындарға нақты пайда әкелуін қамтамасыз ету, – деді Нұрымбет Сақтағанов.
Кездесуде сондай-ақ дәрі-дәрмек тапшылығы мен орта және кіші медициналық қызметкерлердің жетіспеушілігі, жолдарды салу және жөндеу, экология, жастар орталықтары мен ауылдық мәдениет үйлерінің жұмысы сияқты мәселелер қозғалды. Сонымен қатар, Шемонаиха, Риддер, Алтай және Серебрянка қалаларындағы медицина кадрларының тапшылығы мәселесі көтерілді. Қазіргі уақытта «Дипломмен – ауылға» бағдарламасы тек ауылдық елді мекендерді қамтиды, сондықтан бұл бағдарламаның аясын шағын қалаларға дейін кеңейту қажеттілігі атап өтілді. Депутаттардың айтуынша, бұл ұсыныс Үкіметке жолданатын болады.
Әкімнің айтуынша, кездесу мазмұнды әрі нәтижелі өтті. Мұндай кездесулер өңір алдында тұрған мәселелерді кешенді түрде шешуге мүмкіндік береді.
