Қазақстанда көлеңкелі экономикамен күрес жалғасуда. Қаржы министрлігі кезекті бастамасын ұсынып отыр. Енді азаматтар кәсіпкерлердің заң бұзушылықтары туралы хабарласа, мемлекеттен сыйақы алуы мүмкін, деп хабарлайды F16.kz.
НЕ ҮШІН СЫЙАҚЫ БЕРІЛЕДІ?
Келесі жағдайлар бойынша қолдарында нақты дәлелі (фото, видео, чек және т.б.) бар азаматтар сыйақы ала алады:
- Сауда нүктесі банк картасымен төлем қабылдаудан бас тартса;
- Касса чегін бермесе;
- Кассалық аппаратты заңға сай қолданбаса (мысалы, тіркелмеген, өшірілген т.б.).
ЖАЛҒАН АҚПАРАТ ТАРАТСА НЕ БОЛАДЫ?
Егер адам әдейі жалған ақпарат таратса, онда ол Қазақстан Республикасының заңнамасына сәйкес жауапқа тартылады. Бұл үшін әкімшілік немесе қылмыстық жауапкершілік қарастырылған.
МАҚСАТЫ НЕ?
Заң жобасын әзірлеушілер бұл бастаманың негізгі мақсаттары ретінде азаматтық белсенділікті арттыру, құқықтық мәдениетті қалыптастыру, кассалық тәртіпті күшейту мен экономикадағы көлеңкелі айналымды азайту сияқты факторларды атап көрсетуде.
Заң жобасы биылғы 29 шілдеге дейін қоғамдық талқылауға ұсынылды. Барлық азамат мына сілтеме бойынша өтіп, өз ұсыныстары мен пікірлерін қалдыра алады.
