Биылғы жаңа оқу жылынан бастап еліміздің барлық білім беру ұйымдарында, соның ішінде жекеменшік мектептерде де тәрбие жұмысы «Адал азамат» бағдарламасы негізінде жүргізіледі, деп хабарлайды F16.kz.
Оқу-ағарту министрлігінің мәліметінше, бұл – бұрынғы «Біртұтас тәрбие» тұжырымдамасының жаңартылған нұсқасы, Мемлекет басшысының «Адал азамат – адал еңбек – адал табыс» қағидасымен үйлестірілген.
Брендбук әзірленеді
Алғаш рет бұл бағдарлама жекеменшік мектептер үшін де міндетті болмақ. Бұл тәрбие жұмысын ел көлемінде бірыңғай стандартпен жүргізуге, барлық оқушы үшін тең орта қалыптастыруға мүмкіндік береді.
Барлық мектептерге арналған бірыңғай визуалды стандарт – брендбук әзірленеді. Мектептің ішкі және сыртқы келбеті ұлттық тәрбие мен мәдениетті бейнелеуге тиіс.
Үзілісте ұлттық ойындар ойнатылады
Тәрбиелік іс-шаралар мемлекеттік органдар, құқық қорғау, денсаулық сақтау, ішкі саясат құрылымдарымен бірлесе жүргізіледі. Ай сайынғы тақырыптар сабақ пен сыныптан тыс жұмыстармен байланысады. Әділдік, еңбекқорлық, патриотизм сынды құндылықтар оқу үдерісінің өзегіне айналады. Осы бағытта «Өнегелі 15 минут», күймен қоңырау соғу, ұлттық ойындар сынды жаңа форматтар енгізіледі. Сондай-ақ оқушының мектептен тыс өмірлік тәжірибесіне де назар аударылады.
Сонымен қатар, балаларды буллингтен, құқықбұзушылық пен қауіп-қатерден қорғауға бағытталған «Цифрлық әлемде қауіпсіз қадам», «Буллингтен қорған!», «Қауіпсіз қоғам» жобалары жалғасын табады.
Бағдарлама – еліміздегі барлық мектептерде біртұтас тәрбиелік орта қалыптастыруға бағытталған маңызды бастама.
