Шығыс Қазақстан облысының әкімі Нұрымбет Сақтағанов өңір металлургтерін кәсіби мерекелерімен құттықтады, деп хабарлайды F16.kz.
Бүгін облыс әкімдігінде ұйымдастырылған салтанатты іс-шараға Шығыс Қазақстанның металлургия саласында жұмыс істейтін кәсіпорындардың өкілдері – басшылары мен қарапайым жұмысшылары қатысты. Арасында алпауыт компаниялардың қызметкерлерімен қатар, кішігірім өндіріс орындарының өкілдері де болды. Аймақ басшысы мәлім еткендей, қазіргі уақытта Шығыс Қазақстан облысының аумағында 70-тен астам өнеркәсіп кәсіпорыны бар болса, оның 80%-ы өңдеуші өндіріс орындары екен.
Еске салайық, Мемлекет басшысы Қасым-Жомарт Тоқаев 2025 жылды «Жұмысшы мамандықтар жылы» деп жарияланған болатын. Бүгінде осыған байланысты елімізде және облысымызда жұмысшы мамандықтардың, еңбек адамының абырой-беделін көтеруге бағытталған ауқымды жобалар жүзеге асырылып жатыр. Әлбетте, бұл жұмыстан металлургия саласының өкілдері де тыс қалмақ емес. Мұны өз құттықтау сөзінде облыс әкімі Нұрымбет Сақтағанов та атап өтті.
– Құрметті металлургтер, кеншілер, кен байытушылар! Сіздерді кәсіби мерекелеріңіз – Металлургтер күнімен шын жүректен құттықтаймын! Металлургия – Шығыс Қазақстанның жетекші, қала құрушы саласы. Бүгінде бұл сала өңір экономикасының дамуына елеулі үлес қосып отыр. Сіздерге алдағы уақытта толағай табыстар тілеймін. Мерекелеріңіз құтты болсын! – деген аймақ басшысы бұдан кейін ел Президенті атынан сала қызметкерлері мен ардагерлеріне бірқатар мемлекеттік награданы табыс етті.
Рас, бүгінде металлург – ең құрметті әрі абыройлы мамандықтың бірі. Металлургтер мен кеншілердің еселі еңбегінің арқасында кәсіпорындарымыз дамып, ел экономикасының нығаюына өлшеусіз үлес қосуда.
Ал енді салтанатты жиында наградаға ие болғандар туралы аз-кем айта кетсек, бұл күні «Еңбек Даңқы» III дәрежелі орденімен «Востокцветмет» ЖШС Артемьев кеніші жер асты учаскесінің тау-кен шебері Серікқан Төлеубаев пен «Қазцинк» ЖШС мыс зауытының балқытушысы Казез Бекшентаев марапатталды.
«Ерен еңбегі үшін» медалі «Қазцинк» ЖШС Малеев кенішінің тиеу-жеткізу машинасының машинисі Руслан Қарықбаевқа табысталды.
Сондай-ақ, Шығыс Қазақстан облысы әкімінің Алғыс хатымен «Үлбі металлургиялық зауыты» АҚ уран өндірісінің аппаратшысы Михаил Матрёнин, «Өскемен титан-магний комбинаты» АҚ №3 цехының пешшісі Юрий Куликов, «ТМК» АҚ №12 цехының балқытушысы Азамат Қожахметов, «Востокцветмет» ЖШС Ертіс кеніші машинисі Нұрлан Есімбеков, «Востокцветмет» ЖШС Артемьев шахтасының машинисі Архат Көпжасаров марапатталды.
