Биыл Қазақстанда автомобиль жасау саласындағы тағы екі жаңа кәсіпорын іске қосылады. Оның біріншісі – Алматыдағы мультибренд зауыты, ал екіншісі, Қостанайдағы Kia зауыты болмақ, деп хабарлайды F16.kz.
Ұлттық экономика министрі Серік Жұманғариннің төрағалығымен өткен Экономикалық өсуді қамтамасыз ету жөніндегі штаб отырысында белгілі болғандай, Алматыда Changan, Haval және Chery сияқты брендтердің автомобильдерін шығару жоспарланып отыр екен.
Бүгінде Қазақстандағы машина жасау көлемінің шамамен 41%-ы автомобиль өндірісіне тиесілі. Қазіргі уақытта елімізде JAC, Chevrolet, Kia, Lada, Jetour, Hongqi, Skoda, Hyundai және Genesis брендтерін шығаратын екі автозауыт жұмыс істеп тұр.
– Жаңа қуаттарды пайдалануға берудің арқасында елімізде шағын тораптық технология бойынша жиналатын автомобиль өндірісінің көлемі едәуір артады. Бұл модельдер қатарын көбейтуге және отандық автоөнеркәсіптің позициясын нығайтуға мүмкіндік береді, – дейді Өнеркәсіп және құрылыс вице-министрі Олжас Сапарбеков.
2025 жылы Қазақстанда 147 824 автомобиль шығару жоспарлануда. Алайда, вице-министр атап өткендей, салада бұл көрсеткіштен асып түсудің барлық алғышарты бар. Әсіресе, отандық тауар өндірушілерге сертификат беру процесін оңтайландыру қажет.
Вице-премьер Серік Жұманғарин Сауда және интеграция министрлігіне қажетті рұқсат құжаттамасын жедел беру үшін шара қабылдауды тапсырды. Бұл жаңа модельдердің сериялық өндірісін уақтылы іске қосып, қуаттар жүктемесінің артуын қамтамасыз етуге мүмкіндік береді.
