Ел тұрғындары суға шомылып, демалу үшін жағажайға барғанда ақы төлеуі керек пе? Жеке немесе заңды тұлғалардың өзен-көлдердің төңірегін қоршап алуы заңды ма? Бұл сұрақтарға Су ресурстары және ирригация министрлігі жауап берді, деп хабарлайды F16.kz.
Ведомствоның мәліметінше, қолданыстағы Су кодексіне сәйкес, азаматтардың су айдындарының жағалауына еркін кіріп-шығуына құқығы бар. Яғни, ешбір жеке немесе заңды тұлға адамдарға шектеу қоя алмайды. Суды жалпы пайдалану үшін арнайы рұқсат талап етілмейді.
Осыған орай қазақстандықтар:
- суда шомылып, демалып, туризммен айналыса алады;
- моторлы қайықтарды, ауды пайдаланбай әуесқой немесе спорттық бағытта балық аулай алады;
- жайылым жерлерде мал суара алады.
Министрлік кәсіпкерлерге қоршау орнатуға, күзет қоюға немесе басқа да шектеулер қоюға заңмен тыйым салынғанын ескертеді, әрине егер бұл заңмен нақты қарастырылмаған болса. Ал демалушыларға су айдындарында көлік жууға, жанар-жағармай материалдарын сақтауға немесе басқа да жолмен аумақты ластауға болмайды.
Суды арнайы рұқсатсыз коммерциялық мақсатта пайдалануға болмайды. Мысалы, жағалауда ақылы жағажай немесе демалыс базасын ұйымдастыру – бұл кәсіпкерлік қызметке жатады, – деп түсіндірді ведомство өкілдері.
Алайда, ерекшелік жағдайлар да бар. Егер жергілікті атқарушы органдар белгілі бір аумақты ресми түрде ұйымдастырылған жағажай ретінде бекітсе, онда ондай жерде қызмет көрсеткені үшін ақы алынуы мүмкін. Бірақ бұл жағдайда суға еркін қол жеткізуге тыйым салуға болмайды, судың өзіне бару тегін болуға тиіс.
