ҚАЖД қарасты Ұлан аудандық пробация қызметінің аға инспекторы сотталған азаматтан ақша талап еткен, деп хабарлайды F16.kz.
Ұлан аудандық сотының үкімімен аға инспектор ҚР Қылмыстық кодексінің 366-бабы 2-бөлігінде көзделген ауыр сыбайлас жемқорлық қылмысын жасағаны үшін кінәлі деп танылды.
2025 жылы сәуірде бұрыңғы құқық қорғау органдарының өкілі шартты түрде сотталған азаматтан бас бостандығын шектеу жазасын бас бостандығынан айыру жазасына ауыстыру туралы материалдарды сотқа жолдамау үшін жалпы сомасы 400 000 теңге пара алған, — делінген соттың анықтамасында.
Аталған ақша қаражаты екі бөліп алған. 1 сәуір күні 200 мың теңгені инспектор көрсеткен банк шотына сыбайлас жемқорлыққа қарсы қызмет өкілдерінің бақылауымен аударылған. Екінші рет 15 сәуір күні тағы 200 мың теңге жұбайының есепшотына түскен.
Банк шотының иелері бұл қаражат заңсыз алынғанынан бейхабар болған көрінеді.
Сотталушы өз кінәсін толықтай мойындады.
Прокурор соттан орташа қауіпсіздік мекемесінде жазасын өтеумен 3 жыл 6 ай бас бостандығынан айыру жазасын тағайындауды сұрады.
Сот ҚР Қылмыстық кодексінің 366-бабы 2-бөлігі бойынша кінәлі деп танып, оған 12 000 000 теңге көлемінде айыппұл (параның отыз еселенген мөлшері), мемлекеттік қызметте, сот жүйесінде, Ұлттық Банкінде және оған қарасты құрылымдарда лауазым атқару құқығынан өмір бойына айыру, ҚР ҚК 49-бабы негізінде «капитан» арнайы атағынан айыру жазасын тағайындады, — дейді соттың баспасөз қызметі.
Үкім заңды күшіне енген жоқ.
