Катонқарағай аудандық сотында алаяқтық жасады деп айыпталған жергілікті тұрғынға қатысты қылмыстық іс қаралды, деп хабарлайды F16.kz.
Қылмыстық іс материалдарынан белгілі болғандай, сотталушы өзінің танысын алдап, ақшасын иемденуді көздеген. Бұған дейін ол үйленбеген танысына өзінің құрбысымен таныстыра алатынын айтқан. Кейіннен «WhatsApp» мобильді қосымшасы арқылы бөтен есіммен танысып, жәбірленушімен хат алмасқан. Оған тұрмысқа шығатынын айтып, сеніміне кірген. Осылайша, түрлі сылтаумен одан ақша алып отырған. Келтірілген материалдық шығын көлемі – 382 мың теңге.
– Сотталушының әрекеті Қазақстан Республикасы Қылмыстық кодексінің 190-бабы 4-бөлігінің 2-тармағына сәйкес сараланды. Бұл – ақпараттық жүйелерді пайдалану арқылы жасалған алаяқтық, яғни бөтен мүлікті жымқыру немесе оған алдау не сенімді теріс пайдалану арқылы иемдену. Аталған бап бойынша 4 мың айлық есептік көрсеткішке дейін айыппұл, түзеу немесе қоғамдық жұмыстар, не төрт жылға дейінгі мерзімге бас бостандығын шектеу немесе айыру, мүлікті тәркілеу және белгілі бір лауазымдарды атқару немесе қызметпен айналысу құқығынан айыру түрінде жаза қарастырылған, – деп хабарлайды аудандық соттан.
Сот отырысы барысында сотталушы мен жәбірленушінің татуласуына байланысты қылмыстық іс тоқтатылып, Қ. есімді азаматша қылмыстық жауапкершіліктен босатылды. Сот қаулысы заңды күшіне енді.
