Жұмысшы мамандықтар жылын өткізуге арналған іс-шаралар жоспары аясында Шығыс Қазақстан облысындағы техникалық және кәсіптік білім беру ұйымдарында тоғыз жаңа мамандық ашылды, деп хабарлайды F16.kz.
Cондай-ақ, бес колледжде жаңа білім беру бағыттары енгізілді. Атап айтқанда, келесі оқу орындарында жаңа мамандықтар ашылды:
- «Өскемен жоғары политехникалық колледжі» КМҚК;
- «Шығыс Қазақстан көпсалалы колледжі» КМҚК;
- «Өскемен көпсалалы технологиялық колледжі» КММ;
- «Өскемен құрылыс-техникалық колледжі» КММ;
- «Көлік және тіршілік қауіпсіздігі колледжі» ЕҰ.
Өскемен жоғары политехникалық колледжінде екі жаңа мамандық ашылды: «Жаңартылатын энергетика» (мамандық бойынша – жаңартылатын энергетика жабдықтарының операторы); «Қашықтан басқарылатын ұшқышсыз авиациялық жүйелер» (ұшқышсыз ұшу аппараттарының операторы).
Өскемен көпсалалы технологиялық колледжінде «Су көлігін пайдалану (бейіні бойынша)» мамандығы бойынша оқыту басталды. Біліктіліктері: рульші (кормщик) және моторшы (машинист).
Өскемен құрылыс-техникалық колледжінде екі бағытта кадрлар даярлау қолға алынды: «Логистика (салалар бойынша)» (экспедитор, операциялық логист); «Жылжымайтын мүлікті басқару» (хаус-мастер, көпқабатты тұрғын үйді басқарушы).
Шығыс Қазақстан көпсалалы колледжі үш жаңа мамандық ашты: «Ұшақтарды техникалық қызмет көрсету және жөндеу» (слесарь-механик, авиациялық техниканы жинақтаушы слесарь, В санатындағы техник-механик); «Зоотехния» (құс өсіруші, мал шаруашылығы шебері, зоотехник); «Әуе тасымалын ұйымдастыру» (әуе билеттерін брондау және сату жөніндегі агент, әуе тасымалдарын ұйымдастыру жөніндегі агент).
Көлік және тіршілік қауіпсіздігі колледжінде «Төтенше жағдайлардағы қорғау (бейіні бойынша)» мамандығы ашылып, сүңгуір біліктілігі бойынша оқыту басталды.
Барлық білім беру бағдарламасы жұмыс берушілермен бірлесе отырып әзірленіп, «TALAP» КЕАҚ тізіліміне енгізілген. Оқу-әдістемелік материалдар сатып алынды, өндірістік тәжірибе базалары анықталды, жабдықтарды жеткізу басталды.
Барлық колледж қажетті лицензияларды алып, талапкерлерді қабылдауды бастады.
Осы ретте жаңа мамандықтар үшін жабдықтар сатып алуға облыстық бюджеттен 149,15 миллион теңге бөлінгенін айту керек. Сонымен қатар, 2025 жылы колледждердің материалдық-техникалық базасын жаңартуға 234,75 миллион теңге бағытталды.
Атап айтқанда, «Өскемен технология және сервис колледжі» КММ үшін бірқатар мамандық бойынша маман даярлауға арналған жабдықтар сатып алынды. Оның ішінде токарьлық іс, жиһаз өндірісі, бағдарламалық қамтамасыз ету, есептеу техникасы, тігін өндірісі және киім үлгілеу, шаштараз өнері сияқты мамандықтар бар.
