Өскемендегі Ертіс көпірін жөндеу жұмысы келер жылға қалды. Бұл туралы қала әкімі Алмат Ақышов мәлімдеді, деп хабарлайды F16.kz.
Ертіс көпірін жөндеуді келер жылға қалдырамыз. Дәлірек айтсақ, 2026 жылдың мамыр айында бастау керек. Онсыз да қазір көлік кептелісі туындап тұр, қозғалысты қиындатпайық, – деді Алмат Ақышов.
Бұған дейін Өскемен қалалық полиция басқармасы Ертіс көпірінің асфальт қабатын жаңарту жұмысы басталуы себепті көлік қозғалысы шектелетінін хабарлағанын жазғанбыз.
Қалалық полиция басқармасының мәлімдеуінше, 15 шілдеден Сәтпаев даңғылы бойындағы Ертіс өзенінің үстінен өтетін автомобиль көпірінде жол жүру бөлігін күрделі жөндеу басталады. Жұмысты ТҮКШ, жолаушылар көлігі және автомобиль жолдары бөлімінің тапсырысымен мердігер ұйым атқарады. Осыған байланысты ЖМК шағын ауданы жақтан келе жатқандағы көпірдің шеткі екі жолағында көлік қозғалысы шектеледі. Жүргізушілер осы жағдайды қаперде ұстағаны абзал. Күрделі жөндеу жұмысын 1 қыркүйекке дейін аяқтау көзделген.
