Шығыс Қазақстан облысының Тройницкое ауылында салынып жатқан фельдшерлік—акушерлік пункт құрылысы кешеуілдеп тұр. Оған себеп нысанға қажетті медициналық құрал—жабдықтардың жеткізілмеуі және абаттандыру жұмысының жүргізілмеуі, деп хабарлайды f16.kz.
Жуықта облыс әкімінің тапсырмасымен бірінші орынбасары Жақсылық Омар аталған елді мекенде болып қайтты. Құрылыс жұмысымен танысу барысында медициналық құрал-жабдықтардың толық жеткізілмеуі, асфальт жабыны мен тас төсеніштердің төселмеуі, көгалдандыру жұмыстарының жүргізілмеуі, шағын сәулет нысандарының орнатылмауы, су құбырына қосылмау сияқты түйткілді мәселелер анықталған.
Бұл проблемалар фельдшерлік пукнтті көптен күтіп жүрген жергілікті тұрғындардың алаңдаушылығын туғызған және ол орынды. Дәл осындай кемшіліктер Майемер, Барлық, Октябрьск, Тұрғысын, Волчанка сынды ауылдарда ірге көтеріп жатқан медицина нысандарында да анықталды. Осы орайда құрылыс басқармасына кемшіліктерді жойып, жұмысты уақытында аяқтауды және құрал-жабдықтарды жеткізуді қамтамасыз ету тапсырылды. Денсаулық сақтау басқармасына нысанды тезірек қолданысқа беру және мамандарды даярлау жүктелді, – деп атап өтті Жақсылық Омар.
Құрылыс басқармасы барлық кемшіліктерді биылғы қыркүйекке дейін толық жоюды жоспарлап отырғанын жеткізді.
Естеріңізге сала кетейік, «Ауылдық денсаулық сақтауды жаңғырту» ұлттық жобасы аясында өңірде бірнеше жаңа фельдшерлік-акушерлік пункт құрылысы жүргізіліп жатыр. Алайда кейбір нысандарда елеулі кемшіліктер анықталды.
