Қазақстандықтардың 95%-дан астамы елдегі этносаралық қатынастарды тұрақты деп бағалайды, деп хабарлайды F16.kz тілшісі Мәдениет және ақпарат министрлігіне сілтеме жасап.
– Мәдениет және ақпарат министрлігі азаматтық келісімді нығайту және этносаралық қатынастарды дамыту бағытындағы жұмыстарды жалғастыруда. 2025 жылдың бірінші жартыжылдығының қорытындысы бойынша 95%-дан астам респондент елдегі этносаралық қатынастарды тұрақты әрі қолайлы деп сипаттаған, – деп жазады министрліктің баспасөз қызметі.
Жыл басынан бері республика өңірлерінде этносаралық қатынастар саласындағы мемлекеттік саясатты іске асыру аясында ақпараттық-түсіндіру топтары белсенді жұмыс істеуде. Олардың қатысуымен азаматтардың құқықтық және этносаяси сауаттылығын арттыруға бағытталған 2 мыңнан астам оқыту және алдын алу іс-шарасы өткізілген.
Белгілі болғандай, қазір елімізде этномедиация институтын дамытуға ерекше көңіл бөлініп отыр. Республика аумағында құрамына кәсіби медиаторлар, заңгерлер, педагогтар, психологтар, дінтанушылар, журналистер мен қоғам белсенділері кіретін 20-дан астам орталық пен кеңес жұмыс істейді. 2025 жылдың алғашқы жартысында олар 500-ге жуық іс-шара өткізіп, оған 22 мыңнан астам адам қатысқан.
Сондай-ақ, биылдан бастап елдегі 14 жоғары оқу орнында журналистика мамандығы бойынша оқитын студенттерге арналған «Этносаяси сауаттылық» атты жаңа пән енгізілді. Бұл журналистердің медиа кеңістікте этностық тақырыптарға жауапкершілікпен қарауға, тұрақты мәдениетті қалыптастыруға ықпал етеді.
– Этносаралық қақтығыстардың алдын алу бойынша Қазақстан халқы Ассамблеясы жанындағы Аналар кеңесі белсенді рөл атқаруда. Бүгінде 1 700-ден астам осындай ұйым жұмыс істейді. Олар адамгершілік құндылықтарды насихаттауға және отбасылық тәрбиені нығайтуға бағытталған жобаларды жүзеге асыруда. Сонымен қатар, жарты жыл ішінде 300-ден астам мәселені қарастырып, 200-ден астам ұсыныс жасаған Ақсақалдар кеңесі де тиімді жұмыс жасап келеді, – деп хабарлайды дерек көзі.
