Спорт күні қарсаңында шығысқазақстандық бірқатар спортшы марапатталды. Құрметке бөленгендер қатарында халықаралық жарыстардың жеңімпаздары мен жүлдегерлері болды, деп хабарлайды F16.kz.
Салтанатты шараға спортшылар, жаттықтырушылар, спорт ардагерлері мен өңірдің спорт қоғамдастығының өкілдері де қатысты.
Бүгін біз Қазақстанды әлемдік аренада танытып жүрген азаматтарға құрмет көрсетіп жатырмыз. Сіздердің табандылықтарыңыз бен таланттарыңыз, еселі еңбектеріңіз – жастар үшін үлгі әрі бұқаралық спорттың дамуына зор серпін береді, – деді алқалы жиында құттықтау сөз сөйлеген облыс әкімі Нұрымбет Сақтағанов.
Аймақ басшысы спорттағы жетістіктер тек жеке адамның жеңісі емес, бүкіл облыстың, елдің жетістігі мен абыройы, зор мақтаныш екенін атап өтті.
Мақтанышқа айналған ең басты оқиғалардың бірі ретінде семсерлесуден Қазақстан ерлер құрамасының Тбилиси (Грузия) қаласында өткен әлем чемпионатында қола жүлдеге ие болуын атап өткен абзал. Семсерлесуші Руслан Курбанов, Эльмир Әлімжанов, Вадим Шарлаимов және Кирилл Проходов командалық жарыстарда тұңғыш рет жеңіс тұғырынан көрініп, тоғыз дүркін Олимпиада чемпионы Франция құрамасын жеңді.
Азия чемпионатында (Сингапур) көркем гимнастикадан жоғары нәтиже көрсеткен қыздарымыз да жеңіске жетті. Топтық жаттығуларда олар бес шеңбермен және 10 булавамен финалда екі алтын медаль, сондай-ақ көпсайыс пен командалық есепте екі күміс медаль жеңіп алды. Команда құрамында Евгения Вендиревская, Әлия Бақытқызы, Ксения Шимолина, Томирис Вахлова, Елизавета Егорова және Анастасия Чащина болды. Бас бапкер Анара Жантасова спортшыларды даярлаудағы еңбегі үшін арнайы марапатқа ие болды.
Жеңіл атлетикадан Азия чемпионатында (Гуми қаласы, Оңтүстік Корея) күміс жүлдеге ие болған Елизавета Матвеева да ел абыройын асқақтатты.
Салтанатты рәсім барысында жеңімпаздар мен жүлдегерлерге облыс әкімінің алғыс хаттары және ақшалай сертификаттар табысталды.
Спорт ардагерлері Василий Васильченко мен Әбілқайыр Иманбековке спорт саласына сіңірген еңбектері үшін ерекше алғыс айтылды.
Семсерлесу спортының дамуына елеулі үлес қосқан ШҚО семсерлесу федерациясының президенті Игорь Грязновқа алғыс хат табысталды.
