Шығыс Қазақстан облысының 11 елді мекенін байланыстыратын стратегиялық маңызға ие Өскемен-Риддер тасжолы жоспар бойынша қазан айында аяқталуға тиіс, деп хабарлайды F16.kz.
Жалпы ұзындығы 105 шақырым болатын жол учаскесінде жөндеу жұмыстары былтыр басталды. Қазіргі күні басым бөлігі аяқталған. ШҚО әкімі Нұрымбет Сақтағанов автожолды жаңғырту жұмыстарымен танысты.
Негізі келісімшартқа сәйкес кепілдік мерзімі — 2 жыл. Біз мердігер компаниямен келісімді 3 жылға ұзарттық. Осы уақыт ішінде қандай да бір кемшіліктер анықталса, компания өз есебінен барлығын қалпына келтіреді. Жөндеуді қатаң бақылауда ұстаймыз, — деді облыс әкімі Нұрымбет Сақтағанов.
Айта кетейік, былтыр «Қазақстанның Даму банкі» АҚ-ның қаржыландыруымен Өскеменнен Секисовка ауылына дейінгі (0-30 шақырым аралығы) жол аяқталып, пайдалануға берілген.
Биыл Секисовкадан Риддерге дейінгі 75 шақырым жол жөнделіп жатыр. Бүгінде оның 49 шақырымы аяқталған. Кестеге сәйкес учаскеде жөндеу жұмыстарын биылғы қазанда аяқтау жоспарланып отыр.
