Шығыс Қазақстан облысының Асубұлақ кентінде ауызсу құбыры тартылып жатыр. Жоба жүзеге асқанда 524 аула, 1794 тұрғын және 12 әлеуметтік нысан сапалы сумен қамтамасыз етіледі, деп хабарлайды F16.kz.
Ұлан ауданына жұмыс сапарымен барған Шығыс Қазақстан облысының әкімі Нұрымбет Сақтағанов құрылыс жұмысының барысымен барысымен танысты.
Жұмыс суық түспей аяқталуға тиіс. Ең бастысы – сапа. Асығып, қауіпке бас тігуге болмайды. Біз үшін бәрінен де жұмысшылардың қауіпсіздігі, денсаулығы мен өмірі маңызды. Бүгін Бозанбайда жұмыс орнында қайғылы оқиға болды. Сондықтан жұмысшылар мен тұрғындардың қауіпсіздігіне ерекше назар аударуды сұраймын. Мұндай жағдайға жол беруге болмайды, бірақ сонымен қатар нысанды уақытында іске қосу қажет. Қаржыландыру қамтамасыз етілген, тек жұмысты дұрыс ұйымдастыру керек, – деп атап өтті аймақ басшысы.
Сонымен қатар ол техникалық қадағалаушы ұйым бәрін қатаң бақылауда ұстауы қажет екенін еске салды.
Қазір арық қазу, құбыр төсеу, құдықтар орнату, таза су резервуарлары мен сорғы станциясының алаңдарын дайындау, су тартуға арналған ұңғымалар бұрғылау және т.б. жұмыстар атқарылып жатыр. Құрылыс алаңында экскаватор, тиегіш, «КАМАЗ» және басқа да арнайы техникалар жұмыс істеуде. Жоба аясында 524 аула, 1794 тұрғын және 12 әлеуметтік нысанды сапалы ауызсумен қамтамасыз ететін су құбыры желілері салынады. Су құбыры желілерінің жалпы ұзындығы – 45,986 шақырым. Жоба құрамына сыйымдылығы 200 текше метр болатын екі таза су резервуары, екі сорғы станциясы және сыртқы электрмен жабдықтау желілері кіреді. Құрал-жабдықтар Германиядан сатып алынған. Қосымша дизельді генератор бар. Нысанның аумағы жарықтандырылып, қоршалады және бейнебақылау жүйесі орнатылады. Бас мердігер – «КИТ-Холдинг» ЖШС, авторлық қадағалаушы – «Казгражданстройпроект» ЖШС, техникалық қадағалаушы – «Спецстройтехмонтаж-ПВ» ЖШС.
Құрылыс жұмыстарына оң бағасын берген облыс әкімі жалғызбасты зейнеткерлер мен әлеуметтік жағынан аз қамтылған отбасыларға су тартуға көмек көрсету қажеттігін айтты.
