ШҚО әкімі Нұрымбет Сақтағанов «КаР-ТеЛ» ЖШС (Beeline бренді) басшылығымен кездесіп, келіссөз жүргізді, деп хабарлайды F16.kz.
Кездесу барысында тараптар облыстағы елді мекендерді ұялы байланыспен және интернетпен қамту мәселелерін талқылады.
Компания деректері бойынша, өскемендік тұрғындарының жартысынан астамы «КаР-ТеЛ» ЖШС-нің қызметін пайдаланады. Қарқынды дамып келе жатқан қаланың талабына сай болу үшін компания стандартты емес тәсілдердің бірі – телекоммуникациялық жабдықтарды тікелей көше шамдарының тіректеріне орнатуды көздеп отыр. Мұндай әдіс қазір Алматы мен Астана қаласында сәтті жүзеге асып келеді.
Ал жекеменшік секторды ұялы байланыспен қамту мәселесі қала әкімдігімен бірлесіп қаралатын болады. Сонымен қатар жыл соңына дейін Өскемендегі кейбір байланыс тартылмаған аймақтардың мәселесін шешу жоспарланып отыр.
Қазір компания облыс аудандарында 9 антенна-мачталық құрылғы орнатқан. Олардың екеуі жұмыс істеп тұр, қалған жетеуі жақын арада электр желісіне қосылады.
Айта кетейік, бұл компания тек байланыс провайдері емес, өңірде бірқатар әлеуметтік бастаманың жүзеге асуына атсалысып келеді. Мысалы, биыл ШҚО-ның цифрлық инфрақұрылымын дамытуға оператор 3,5 миллиард теңге бөлуді жоспарлап отыр.
Сонымен қатар туристік аймақтар – Алтай, Самар және Катонқарағай аудандары ерекше назарға алынды. Бұл өңірлерде компания жол құрылысы мен жөндеу жұмыстары кезінде, әсіресе республикалық және облыстық маңызы бар автожолдарда, талшықты-оптикалық желілерді тартуға дайын.
Интернет – бұл туризмнің, қауіпсіздіктің және экономиканың дамуы. Әр жобамен нақты және сапалы айналысу қажет, — деп атап өтті облыс әкімі.
Облыста 100 адамнан аз тұрғыны бар 117 елді мекен тіркелген, оларда әлі күнге дейін интернет жоқ. Компания жарық бағаналарын тиімді пайдалану үшін электр қуатымен жабдықтаушы компаниялармен байланысты дамыту жолын ұсынды.
