Шығыс Қазақстан облысының әкімі Нұрымбет Сақтағанов жақын арада ел шебін күзетуге кірісетін Шекара қызметі бөлімшелерінің болашақ командирлерімен кездесті, деп хабарлайды F16.kz тілшісі облыс әкімінің баспасөз қызметіне сілтеме жасап.
Аймақ басшысы атап өткендей, шекарашылар әрдайым Қарулы күштердің элитасы болып саналған және солай болып қала береді. Олардың иығына ерекше жауапкершілік – мемлекеттік шекараны қорғау және елдің қауіпсіздігін қамтамасыз ету міндеті жүктелген.
Болашақ командирлер күрделі дайындықтан өтіп, қызметке әзірлігін және таңдаған мамандығына адалдығын растады.
– Сіздер туған-туыстарыңыздың сенімін, ең бастысы – бүкіл елдің үмітін ақтауларыңыз керек. Сіздерге рух беріктігін, іске және Отанға адалдық тілеймін, – деді Нұрымбет Сақтағанов жас офицерлерге.
Кездесу барысында 33 шекарашыға алғыс хаттар табысталды.
Айта кетейік, Шығыс Қазақстан облысы – бірден екі мемлекетпен: Ресей Федерациясы және Қытай Халық Республикасымен шектесетін шекаралық аймақ. Сондықтан бұл өңірдегі шекарашылар қызметі ерекше стратегиялық маңызға ие.
